Danışan qarışqalar şübhəsinə cavab

Bu gün “müsəlman insan rasional olmalıdır və hər şeyə aldanmamalıdır” başlıqlı yazdığım statusa bir ateist rəy yazıb ki, “sanki danışan qarışqaya inanan ateistlərdir.” Bu zaman insanı iki sual düşündürür: 1. Həqiqətənmi qarışqaların danışdığına inanmaq insanı rasional düşüncədən çıxarır? 2. Görəsən ateistlərin inandığı şeylər dahamı rasionaldır, yoxsa onlar özləri daha gülünc müddəalara inanırlar? Məsələyə daha dərindən nəzər yetirək.

1. Quranda qarışqaların danışması.

Qurani-Kərimin Nəml surəsində hz. Süleymanın ordusuyla səfərindən bəhs edilir. Surənin 18-ci ayəsində deyilir: “Nəhayət, onlar qarışqa vadisinə gəldikdə bir qarışqa belə dedi: `Ey qarışqalar, yuvalarınıza girin ki, Süleyman və ordusu fərqinə varmadan sizi əzməsinlər!`” Davamında, 19-cu ayədə qeyd edilir: “Süleyman onun sözünə gülümsəyib dedi: `Ey Rəbbim! Həm mənə, həm də ata-anama verdiyin nemətə görə şükür etməyim və Sənin razı qalacağın yaxşı işlər görməyim üçün mənə güc ver! Öz mərhəmətinlə məni saleh qullarının arasına daxil et!`” Bu iki ayədən açıq-aşkar başa düşürük ki, Qurani-Kərimə görə qarışqalar danışır və hz. Süleyman onların nə dediyini başa düşür. Bu halda öncə ilk müddəaya baxaq: qarışqalar danışırmı?

2. Qarışqaların danışması

2009-cu ildə Oksford universitetinin professoru ekoloq Ceremi Tomasın rəhbərliyi altında qarışqalar üzərində bir test keçirildi. Belə ki, mikro ölçülü səsyazma cihazları qarışqaların yuvalarına yerləşdirildi və müşahidə edildi. Müşahidə zamanı görüldü ki, kraliça qarışqa çıxardığı səslərlə digər qarışqaları açıq-aşkar idarə edir. Yəni, qarışqaların nə etməsini, necə etməsini təyin edən kraliça qarışqanın dedikləridir. Sonradan səsyazma cihazları ilə qeyd olunan səslər cihazlardan səsləndirildiyi zaman, qarışqalar yenə də eyni reaksiyaları verirlər.(1) Bu açıq aşkar göstərir ki, qarışqalar öz aralarında danışırlar və bir kraliça qarışqa onları idarə edir. Sadəcə insan qulağının eşitdiyi səslər 20-20 000 hz aralığındadır. Qarışqaların danışıq səsləri 20 hz-dən aşağı olduğu üçün, normal şərtlər altında onu eşidə bilmirik.

Bu elmi fakt bizə onu göstərir ki, qarışqalar həqiqətən də danışırlar və buna inanmaq insan heç də irrasional etmir, əksinə daha da rasional edir.

3. Hz. Süleymanın qarışqaları anlaması

Qarışqaların danışmasını artıq tam dəqiqliklə bilirik, bəs hz. Süleymanın onları başa düşməsi mümkün idimi? Əlbttə ki, mümkün idi. İnsan qulağı normal şərtlər altında qarışqaların danışıq səsini eşidə bilmir, amma bu sadəcə normal şərtlərə daxildir. Məsələn, xüsusi cihazlarla onların çıxardığı səsləri eşidə bilirik. Ya da xüsusi insan bunu eşidə bilərdi. Hz. Süleyman peyğəmbər idi və bizim inancımıza görə hər şeyi yaradan Allah ona heyvanları başa düşməyi öyrətmişdi. Məsələyə bu prizmadan yanaşsaq, Süleymanın qarışqaların səsini eşitməsi və başa düşməsi olduqca mümkündür. Faktiki olaraq son əsrə qədər qarışqaların danışması dini mətnlərdən başqa heç bir yerdə bilinmirdi. Allah hz. Muhəmmədə qarışqaların danışdığını bildirdiyi kimi, Süleymana da onları eşitməyi və başa düşməyi öyrədə bilərdi.

4. Ateistlər daha rasional şeylərəmi inanırlar?

Ateistlərin dindarlara irad tutduğu şeylərin demək olar ki, hamısı realda mümkün olan, rasional şeylərdir. Təkcə qarışqaların danışmasından yola çıxaraq gördük ki, 20-30 il əvvəl mümkünsüz olan şey (halbuki 1400 il öncə Quranda yazılmışdı) bu gün tamamilə mümkündür. Yəni, 20-30 il əvvəl qarışqaların danışmasını heç kim bilmirdisə, son illərdə professor Cereminin araşdırması onların danışdığını sübuta yetirdi. Ateistlərin bizə tutduğu iradlar bir müddət sonra həqiqət kimi ortaya çıxır. Bəs ateistlərin öz inandıqları müddəalar?

Məsələn, ateistlər inanırlar ki,heç bir müdaxilə olmadan okean dibində amin turşular yarandı və bu turşular sistematik düzülərək ilk hüceyrəni formalaşdırdılar. Amin turşuların sistematik düzülməsini kənara qoyaq, müdaxiləsiz düzülmələri belə qeyri-mümkündür. Amin turşular suda heç bir funksiyaya malik deyillər və birləşmələri üçün müdaxilə labüddür. Ateistlər isə bunun müdaxiləsiz birləşdiyinə, özü də canlını yaradacaq düzülüşlə düzüldüyünə inanırlar. Buna inanmaq üçün gərək bütün elmləri kənara atasan və düşünməyəsən.

Yaxud, ateistlər inanırlar ki, səbəb və nəticə zənciri əzəlidir. Buna inanmaq ağılı çıxarıb kənara qoymaq kimidir. Səbəb və nəticə zənciri əzəli olsa, nəticə deyə bir şey heç bir zaman ortaya çıxa bilməz.

Bunun kimi ateistlərin demək olar ki, bütün inancları ağıla, məntiqə və elmə ziddir. Buna rəğmən bizi ağılsızlıqla, irrasionallıqla günahlandırırlar. Qurani-Kərimdə də deyildiyi kimi: “heç düşünənlə düşünməyən bir ola bilərmi?”

(1)Jeremy A Thomas - Queen Ants Make Distinctive Sounds That Are Mimicked by a Butterfly Social Parasite

Onlara.de